Шымкентте 140 спортшы бақ сынаған бозбалалар арасында қазақ күресінен жарыс өтті.
Шара Дүниежүзілік көшпенділер ойындарын насихаттау аясында өтті.
Шымкентте Қазақстан күресінен жасөспірімдер арасында салтанатты түрде қалалық ашық біріншілік өтті. Жарысқа барлығы 140 спортшы қатысты. Оның ішінде 13 жасар Бақберген Әсетбай қарсыласын жауырынымен шебер түйреп, ақтық сынға шықты.
Бақберген Әсетбай, жас балуан: «Беттес оңай болған жоқ. Қарсыластың да дайындығы жақсы болды. Бірақ мен үлгердім. Біз жан-жақты дайындалдық. Бапкеріміз Нұрсұлтанға мың алғыс».
Жарыс 8 қыркүйекте басталатын Дүниежүзілік көшпенділер ойындарын насихаттау мақсатында ұйымдастырылып отыр. Оған шымкенттік спортшылар да қатысады.
Маратбек Мықтыбеков, қалалық дене шынықтыру және спорт бөлімінің басшысы: «Дүниежүзілік көшпенділер ойындарын насихаттау шаралары аясында әр облыста осындай жарыстар өтуде. Бұл ойындарға шымкенттік 16 спортшы қатысып, күрес, тоғызқұмалақ, асық ату, атқа міну сынды спорт түрлерінен бақ сынасады. 4-5 алтын алуды жоспарлап отырмыз».
Барлық жеңімпаздар медальдармен және арнайы дипломдармен марапатталды.