Үш ай әділдік үшін күрес. Түркістан облысында 50 жастағы Нұртай Хожанов полицейлер оны сегіз ешкі ұрлады деп күдіктеніп, аяусыз соққыға жыққанын айтты.
Көз жасын тыя алмай қиналған Нұртай Хожанов өмірін өзгерткен оқиғаларға тоқталды. Шардара ауданына осыдан он жыл бұрын Өзбекстаннан оралған шопан. Қыркүйек айында ол қылмыстық істің ортасында қалды. Полицейлер оны сегіз ешкі ұрлады деп айыптады.
Нұртай Хожанов, Түркістан облысының тұрғыны: «Мені полиция бөлімшесіне алып барды, бірден ұра бастады. Олар менің аузымды скотчпен жауып, басымды қабырғаға соғып, жыныс мүшелерімді бұрап алды. Олардың үшеуі болды, олардан алкогольдің иісі шықты».
Кейіннен ұрланған малдың табылып, ұрлықты басқа адамдар жасағаны белгілі болды. Алайда, бұл Хожанов үшін жеңілдік болған жоқ. Оның айтуынша, полицейлер кейін кешірім сұрағанымен, келтірілген шығынды қалпына келтіру мүмкін болмады. Дәрігерлер жарақатты ауыр деп диагноз қойды, енді ер адам баласыз қалуы мүмкін.
Жадыра Наурызбайқызы, жәбірленушінің заңды өкілінің көмекшісі: «Олар басына сөмке кигізіп, аузын скотчпен басып, жыныс мүшелерін бұрап азаптады. Медициналық тексеру денсаулықтың ауыр зардаптарын растады».
Нұртай Хожанов прокуратураға шағым түсіргенімен, дәлелдемелердің жоқтығынан арызы ұзақ уақытқа қабылданбаған. Тек желтоқсан айында адвокаттың араласуынан кейін іс қозғалды.
«Түркістан облыстық полиция департаментінің ішкі қауіпсіздік басқармасы қызметтік өкілеттігін асыра пайдаланғаны үшін қылмыстық іс қозғады. Сотқа дейінгі тергеу амалдары жүргізілуде, іс бақылауға алынды», — деп хабарлады Түркістан облыстық прокуратурасының баспасөз қызметі.
Жәбірленуші тарап істі қайта саралауды сұрап, азаптау мен адам ұрлау туралы баптарды қосуды талап етті.
«Мен әділдік орнағанын қалаймын. Маған жасағандары үшін жауап берсін», – дейді Түркістан облысының тұрғыны Нұртай Жоханов.
Нұртай Хожанов қазір әйелі мен қызымен тұрады, бірақ қайғылы оқиғаның салдарынан олардың болашағы бұлыңғыр болады.