Келес ауданындағы Абай ауылының тұрғыны Гүлназ Мыңжасар көп балалы және үшемнің анасы атанды. Ұлдарға Қасым, Жомарт, қызға Кемел есімдері берілді. Әйелдің айтуынша, атасы түсінде жаңа туған нәрестелерге есімдер ұсынған.
Гүлназ Мыңжасар, үшемнің анасы: «Түсімде атам балаларға Қасым, Жомарт, Кемел есімдерін қоюды айтты. Үйдегілерге айтқанымда барлығы бірден келісті».
Гүлназ жүктіліктің 30-аптасында босанып, алғашқы күндері жаңа туған нәрестелердің жағдайы ауыр болған. Үшем екі апта бойы дәрігерлердің бақылауында болды. Қазіргі уақытта сәбилер салмақ қосып, ауруханадан шығуға дайын.
Салтанат Забагиева, №1 облыстық перинаталдық орталық директорының міндетін атқарушы: «Босану хирургиялық жолмен болды. Ұлдардың салмағы 1925 және 1965 грамм, қыздардың салмағы 1985 грамм. Қазіргі уақытта балалардың жағдайы бірқалыпты, емшек сүтімен қоректенеді».
Гүлназ Мыңжасарды балаларымен бірге жеті апа күтіп тұрған үйіне шығарып салды. Айтпақшы, Түркістан облысында жыл басынан бері 8 топ үшем дүниеге келген.