Шымкентте 4 мыңға жуық науқасқа тегін дәрі-дәрмек алуға кепілдік жоқ. Қалалық прокуратура медициналық мекемелерді тегін дәрі-дәрмекпен қамтамасыз етудің заңдылығын тексерді.
Қаладағы 12 емханада заң бұзушылықтар анықталды. Медициналық мекемелерге 2 миллион теңге айыппұл салынып, бас дәрігерлер әкімшілік жауапкершілікке тартылды. Жүзден астам медицина қызметкері тәртіптік жауапкершілікке тартылды.
«Егер заң бұзушылықтар бір жыл ішінде бірнеше рет анықталса, Кодекстің 426-бабының 2-тармағының ережелеріне сәйкес әкімшілік жауапкершілік те туындайды. Бұл жұмысты тоқтатуға және фармацевтикалық лицензиядан айыруға әкелуі мүмкін, — дейді Шымкент қалалық қоғамдық мүдделерді қорғау департаментінің аға прокуроры Ғани Бейсенбаев.