Нұртас ауданында жаңадан салынып, пайдалануға берілген жолдар бұзылып жатыр. Хан Тәңірі көшесі тұрғындарының айтуынша, кепілдік мерзімі бітпей жатып-ақ жол жамылғысы жарамсыз болып қалған. Жыл сайын шұңқырлар жөнделсе де, жол жағдайы өзгеріссіз.
«Жыл сайын солай. Жөндейді, қайта бұзылады. Жөндеуге келеді, қайта бұзылады. Қазір қайта жөндеуден өтіп жатыр. Жөндеп жатқанда өту мүмкін емес. Автобустар айналып жүреді. Сондай-ақ су құдығы бар, құдықтың қақпағы әлі ашық»..
Қазір асфальты салбырап жатқан жерлерге қиыршық тас пен топырақ қоспасы төселді. Кейбір жерлерде шұңқырларды жөндеу жұмыстары жүргізілді. Қалалық әкімдік бұл мәселені біліп, асфальттың шөгуін дренаждық жүйемен байланыстырды.
«Бұл бағыт бойынша 2023 жылы су ағызу жүйесін орнату жұмыстары басталып, 2024 жылы бұл нысан мемлекет қабылдауына беріледі. Алайда жақында жауған жаңбырдан кейін кейбір асфальт бөліктері шөгіп, жол жабынының бұзылуына әкеліп соқты.»Шымкент қаласы әкімдігінің баспасөз қызметі.
Қалалық әкімдік компанияға жол төсеніштерін қалпына келтіріп, асфальт төсеу үшін келісімшартқа отыруды тапсырды. Энергетика және инфрақұрылымды дамыту басқармасы бұл жобалардың сапасын қадағалауы керек.