Алдағы бірнеше сағатта Куба жағалауына соғатын «Рафаэль» дауылы республикада жарықтың толық сөніп қалуына себеп болды. Бұл туралы Энергетика және тау-кен министрлігіне қарасты Union Electrica энергетикалық компаниясы хабарлады.
Әлеуметтік желілерде жарияланған хабарламада: «Рафаэль дауылы себеп болған қатты жел ұлттық электр желісін толығымен тоқтатты» делінген.
Мәселені шешу үшін құзырлы орындар жұмыс істеп жатқаны белгілі.
«Рафаэль» дауылы үшінші категорияға дейін күшейгені бұрын белгілі болған. Жақын арада ол Кубаның оңтүстік жағалауына жетіп, астанамен қатар батыс провинцияларды да басып өтеді.
Бір күн бұрын республикалық үкімет барлық азаматтарды сабырлы болуға және аса қажет болмаса, үйлерінен шықпауға шақырған болатын.