АЛМА-АТА, 8 қараша. Алматыдағы орталық зиратқа «Ұрпақтар жады» акциясы аясында Ұлы Отан соғысы далаларының топырағы бар капсулалар жерленді. Бұл туралы журналистерге Алматы қалалық Ардагерлер кеңесі төрағасының орынбасары Мұрат Абдушкуров айтты.
«Осы іс-шара аясында біз бұл капсулаларды 8 қарашада орталық зиратқа (Алматы) Ұлы Отан соғысында қаза тапқандар стелласы жанына жерледік», — деді ол. Оның айтуынша, капсулаларда Волоколамск, Дубосеково қиылысы және Брест бекінісінің топырағы бар.
Жерлеу рәсіміне ардагерлер ұйымдарының және қала басшылығының өкілдері қатысты.
Қыркүйек айының соңында ресейлік ардагерлер ұйымдары Ұлы Отан соғысы майдандарынан Алматыға жерлеу үшін, оның ішінде Панфилов атындағы 316-атқыштар дивизиясының жауынгерлері соғысқан Мәскеу облысындағы Дубосеково қиылысынан топырақ капсулаларын тапсырды. Дивизия Алматыда, негізінен, Қазақ және Қырғыз КСР тұрғындарынан алынды.
1941 жылы қарашада «Красная звезда» газетінде Дубосеково қиылысындағы шайқас туралы мақалалар жарияланды, онда генерал-майор Иван Панфилов басқарған 316-атқыштар дивизиясының 28 кеңес жауынгері неміс армиясының басым танктерінің алға жылжуын тоқтатты. Бұл шайқас тарихқа 28 батыр-панфиловшылардың ерлігі ретінде енді.