Шымкентте ана мен бала өлімі үш есеге азайған. Оның басты себебі медицина кадрларын даярлаудағы сапалы көзқарас пен заманауи технологияны қолданумен байланысты дейді.
Гүлбану Сыздықова, қалалық перинаталдық орталықтың бас дәрігері: «Технология қаншалықты заманауи болса да, медицина қызметкерлерінің кәсіби біліктілігінсіз мұндай нәтижеге жету мүмкін емес. Біз кәсіби мамандарды үздіксіз дайындауға және инновацияға баса назар аударамыз. Бұл біздің жетістіктеріміздің негізі болды».
Күн сайын ана мен бала өмірі үшін күресіп жүргендердің бірі – перинаталдық орталықтың бас дәрігері Гүлбану Сыздықова. Оның медициналық тәжірибесі 35 жылдан асады. Әріптестер оны тамаша дәрігер ғана емес, сонымен қатар тиімді басшы деп атайды.
Ақмарал Мақашева, перинаталдық орталықтың қызметкері: «Оның жетекшілігімен біздің орталық тамаша жетістіктерге жетті. Ол бұрын жұмыс істеген қаладағы No2 ауруханада 2010-2017 жылдар аралығында бірде-бір ана өлімі тіркелмеген. Ал 2024 жылы біздің орталық еліміздегі ең үздік 5 перзентхананың қатарына кіреді.
Жыл сайын қаладағы перинаталдық орталықта 10 мыңға жуық сәби дүниеге келеді. Мұнда ана атанған қыз-келіншектер дәрігерлердің кәсіби шеберлігін, жылы көзқарасын атап өтеді.
Гүлсім Ермолдақызы, Шымкент қаласының тұрғыны: «Жүктілігімнің 31 аптасында асқынып кеттім. Дәрігерлер кесар тілігін жасап, баламның өмірін сақтап қалды. Біз олардың жұмысына ризамыз».
Гүлбану Сыздықованың әңгімесі өз кәсібіне берілгендіктің, үнемі биік шыңға ұмтылудың үлгісі. Оның басшылығымен Қалалық перинаталдық орталық адам өмірін сақтап қана қоймай, бүкіл денсаулық сақтау жүйесіне жоғары талаптар қояды.