Шымкенттің энергетикалық инфрақұрылымын қалпына келтіруге жергілікті бюджеттен екі миллиард теңге бөлінді, деп хабарлайды 24KZ.
Бұл қаржы Қайнарбұлақ пен Құрсай аудандарындағы қосалқы станцияларды жөндеуге және электр желілерін ауыстыруға жұмсалады. Өткен жылы қаланы негізгі электрмен жабдықтаушы «Оңтүстік Жарық» компаниясы өзінің инвестициялық бағдарламасы аясында 180 шақырым магистральдық желіні салды. Бюджет есебінен үш шағын ауданда электр желілері жаңартылды.
Энергетика және инфрақұрылымды дамыту басқармасының өкілі Шохан Айдарбектің айтуынша, қаладағы электр желісінің 57 пайызының тозығы жеткен.
Шохан Айдарбек, қалалық энергетика және инфрақұрылымды дамыту басқармасының басшысы: «Қаладағы желінің жартысынан көбі ескі. Олар 50-70 жыл бұрын орнатылған. Абоненттік төлем ретінде түскен ақшаны электр желілерін ауыстыруға саламыз. Бюджеттен де қаражат бөлінеді».